5:1
Avant venu de ruine Celtique,
Dedans le temple deux palementeront
Poignard coeur, d'un monté au coursier et pique,
Sans faire bruit le grand enterreront.
5:2
Seps coniurés au banquet feront luire,
Contre les trois le fer hors de navire
L'un les deux classes au grand fera couduire,
Quand par le mail. Denier au front luy tire.
5:3
Le successeur de la Duché viendra.
Beaucoup plus outre que la mer de Tosquane:
Gauloise branche la Florence tiendra,
Dans son giron d'accord nautique Rane.
5:4
Le gros mastin de cité deschassé,
Sera fasché de l'estrange alliance,
Apres aux champs avoir le cerf chassé
Le lous et l'Ours se donront defiance.
5:5
Souz ombre faincte d'oster de servitude,
Peuple et cité l'usurpera luy mesmes
Pire fera par fraux de jeune pute,
Livré au champ lisant le faux proesme.
5:6
Au Roy l'augur sur le chef la main mettre,
Viendra prier pour la paix Italique:
A la main gauche viendra changer le sceptre,
De Roy viendra Empire pacifique.
5:7
Du Triumvir seront trouvé les os,
Cherchant profond thresor aenigmatique.
Ceux d'alentour ne seroit en repos.
Ce concaver marbre et plomb metallique.
5:8
Sera laissé le feu vif, mort caché,
Dedans les globes horrible espouvantable.
De nuict a classe cité en poudre lasché,
La cité a feu, l'ennemy favorable.
5:9
Jusques au fonds la grand arq demolue,
Par chef captif l'ami anticipé,
Naistra de dame front, face chevelue,
Lors par astuce Duc a mort attrapé.
5:10
Un chef Celtique dans le conflict blessé,
Aupres de cave voyant siens mort abbatre:
De sang et playes et d'ennemis pressé,
Et secourus par incognus de quatre.
5:11
Mer par solaires seure ne passera,
Ceux de Venus tiendront toute l'Affrique:
Leur regne plus Saturne n'occupera,
Et changera la part Asiatique.
5:12
Aupres du lac Leman sera conduite,
Par garse estrange cité voulant trahir:
Auant son meutre a Auspourg la grand suitte,
Et ceux du Rhin la viendront invahir.
5:13
Par grand fureur le Roy Romain Belgique
Vexer vouldra par phalange barbare:
Fureur grinsseant, chassera gent Lybique
Despuis Pannons jusques Hercules la hare.
5:14
Saturne et Mars en Leo Espagne captive,
Par chef Lybique au conflict attrapé,
Proche de Malthe, Heredde prins vive,
Et Romain sceptre sera par coq frappé.
5:15
En navigant captif prins grand pontife,
Grand aprets faillir les clercz tumultuez:
Second esleu absent son bien debife,
Son favory bastard a mort rué.
5:16
A son haut pris plus la lerme sabee,
D'humaine chair par mort en cendres mettre,
A l'isle Pharos par Croisars pertubee,
Alors qu'a Rodes paroistra dur espectre.
5:17
De nuict passant le Roy pres d'une Andronne,
Celuy de Cypres et principal guette.
Le Roy failly, la main fuict long du Rosne,
Les conjurés l'iront a mort mettre.
5:18
De deuil mourra l'infelix profligé,
Celebrera son vitrix l'hecatombe:
Pristine loy, franc edit redigé,
Le mur et Prince au septiesme jour tombe.
5:19
Le grand Royal d'or, d'aerain augmenté,
Rompu la pache, par jeune ouverte guerre:
Peuple affligé par un chef lamenté,
De sang barbare sera converre terre.
5:20
Dela les Alpes grande armée passera,
Un peu devant naistre monstre vapin:
Prodigieux et subit tournera
Le grand Tosquan a son lieu plus propin.
5:21
Par le trespas du monarque latin,
Ceux qu'il aura par regne secouruz:
Le feu luira divisé le butin.
La mort publique aux hardis incoruz.
5:22
Avnt, qu'a Rome grand aye rendu l'ame
Effrayeur grande a l'armee estrangere:
Par esquadrons l'embusche pres de Parme,
Puis les deux rouges ensemble feront chere.
5:23
Les deux contens seront unis ensemble,
Quand la pluspart a Mars seront conjoinct:
Le grand d'Affrique en effrayeur et tremble,
DUUMVIRAT par la classe desjoinct.
5:24
Le regne et loys souz Venus eslevé,
Saturne aura sus Jupiter empire
La loy et regne par le Soleil levé,
Par Saturnins endurera le pire.
5:25
Le prince Arabe Mars, Sol, Venus, Lyon
Regne d'Eglise par mer succombera:
Devers la Perse bien pres d'un million,
Bisance, Egypte ver. serp. invadera.
5:26
La gent esclave par un heur Martial,
Viendra en haut degré tant esleuee,
Changeront Prince, naistre un provincial,
Passer la mer copie aux monts levee.
5:27
Par feu et armes non loing de la marnegro,
Viendra de Perse occuper Trebisonde:
Trembler Phatos Methelin, Sol alegro,
De sang Arabe d'Adrie couvert onde.
5:28
Le bras pendu et la jambe liee,
Visage pasle, au sein poignard caché,
Trois qui seront jurez de la meslee
Au grand de Gennes sera le fer lasché.
5:29
La liberté ne sera recouvree,
L'occupera noir, fier, vilain, inique,
Quand la matiere du pont sera ouvree,
D'Hister, Venise faschee la republique.
5:30
Tout a l'entour de la grande Cité,
Seront soldats logez par champs et villes.
Donner l'assaut Paris, Rome incité
Sur le pont lors sera faicte, grand pille.
5:31
Par terre Attique chef de la sapience,
Qui de present est la rose du monde:
Pont ruiné et sa grande preeminence
Sera subdite et naufrage des undes.
5:32
Oa` tout bon est tout bien Soleil et Lune
Est abondant, sa ruine s'approche.
Du ciel s'advance vaner ta fortune,
En mesme estat que la septiesme roche.
5:33
Des principaux de cité rebellee
Qui tiendront fort pour liberté ravoir.
Detrencher masles, infelice meslee,
Cris, hurlemens a Nantes piteux voir.
5:34
Du plus profond de l'Occident Anglois
Oa` est le chef de l'isle Britannique
Entrera classe dans Gironde, par Blois
Par vin et sel, ceux cachez aux barriques.
5:35
Par cité franche de la grand mer Seline
Qui porte encores a l'estomach la pierre,
Angloise classe viendra soubs la bruine
Un rameau prendre, du grand ouverte guerre.
5:36
De soeur le frere par simulte faintise
Viendra mesler rosee en myneral:
Sur la placente donne a vielle tardifve,
Meurt le goustant sera simple et rural.
5:37
Trois cents feront d'un vouloir et accord,
Que pour venir au bout de leur attaincte,
Vingt mois apres tous et records
Leur Roy trahy simulant haine saincte.
5:38
Ce grand monarque qu'au mort succedera,
Donnera vie illicite et lubrique,
Par nonchalance a tous concedera,
Qu'a la parfin faudra la loy Salique,
5:39
Du vray rameau de fleur de lys issue
Mis et logé heretier d'Hetrurie:
Son sang antique de longue main tissu,
Fera Florence florir en l'armoirie.
5:40
Le sang royal sera si tresmeslé,
Contrainct seront Gaulois de l'Hesperie:
On attendra que terme soit coulé,
Et que memoire de la voix soit perie.
5:41
Nay souz les umbres et journee nocturne,
Sera en regne et bonté souveraine:
Fera renaistre son sang de l'antique urne,
Renouvellant siecle d'or pour l'aerain.
5:42
Mars esleué en son plus haut befroy,
Fera retraire les Allobrox de France:
La gent Lombarde fera si grand effroy,
A ceux de l'Aigle comprins souz la Balance.
5:43
La grand' ruine des sacrez ne s'esloigne,
Provence, Naples, Sicille, Seez et Ponce,
En Germanie, au Rhin et la Cologne,
Vexez a mort par ceux de Magonce.
5:44
Par mer le rouge sera prins de pyrates,
La paix sera par son moyen troublee:
L'ire et l'avare commettra par fainct acte,
Au grand Pontife sera l'armee doublee.
5:45
Le grand Empire sera tost desolé
Et translaté pres d'arduenne silve:
Les deux bastardz par l'aisné decollé,
Et regnera Aenodarb, nez de milve.
5:46
Par chapeaux rouges querelles et nouveaux scismes
Quand on aura esleu le Sabinois:
On produira contre luy grands sophismes,
Et sera Rome lesse par Albanois.
5:47
Le grand, Arabe marahera bien avant,
Trahy sera par les Bisantinois:
L'antique Rodes luy viendra audevant,
Et plus grand mal par autre Pannonois.
5:48
Apres la grande affliction du sceptre,
Deux ennemis par eux seront defaictz:
Classe d'Afrique aux Pannons viendra naistre,
Par mer et terre seront horribles faictz.
5:49
Nul de l'Espaigne, mais de l'antique France
Ne sera esleu pour le trembant nacelle
A l'ennemy sera faicte fiance,
Qui dans son regne sera peste cruelle.
5:50
L'an que deux freres du lys seront en aage,
L'un d'eux tiendra la grande Romanie:
Trembler les monts, ouvert Latin passage,
Pache macher contre fort d'Armenie.
5:51
La gent de Dace, d'Angleterre et Polonne
Et de Boesme feront nouvelle ligue.
Pour passer outre d'Hercules la colonne,
Barcins, Tyrrens dresser cruelle brique.
5:52
Un Roy sera qui donra l'opposite.
Les exilez eslevez sur le regne:
De sang nager la gent caste hypolite,
Et florira long temps soubs telle enseigne.
5:53
La loy du Sol et Venus contendens
Appropiant l'esprit de prophetie:
Ne l'un ne l'autre ne seront entendus,
Par sol tiendra la loy du grand Messie.
5:54
Du pont Euxine, et la grand Tartarie,
Un Roy sera qui viendra voir la Gaule,
Transpercera Alane et l'Armenie,
Et dedans Bisance lairra sanglante gaule.
5:55
De la Felice Arabie contrade,
N'aistra puissant de loy Mahometique:
Vexer l'Espagne, conquester la Grenade,
Et plus par mer a la gent Ligustique.
5:56
Par le trespas du tres vieillart pontife
Sera esleu Romain de bon aage,
Qu'il sera dict que le siege debiffe,
Et long tiendra et de picquant ouvrage.
5:57
Istra de mont Gaulfier et Aventin,
Qui par trou avertira l'armee
Entre deux rocs sera prins le butin,
De SEXT. mansol faillir le renommee.
5:58
De l'aqueduct d'Uticense Gardoing,
Par la forest et mont inacessible,
En my du pont sera tasché au poing,
Le chef nemans et qui tant sera terrible.
5:59
Au chef Anglois a Nymes trop sejour,
Devers l'Espaigne au secours Aenobarbe:
Plusieurs mourrant par Mars ouvert ce jour,
Quand an Artois faillir estoille en barbe.
5:60
Par teste rase viendra bien mal eslire,
Plus que sa charge ne porte passera.
Si grande fureur et raige fera dire,
Qu'a feu et sang tout sexe trenchera.
5:61
L'enfant du grand n'estant a sa naissance,
Subjugera les hauts monts Apennis:
Fera trembler tous ceux de la balance,
Et de monts feux jusques a mont Senis.
5:62
Sur les rochers sang on les verra plouvoir,
Sol Orient Saturne Occidental:
Pres d'Orgon guerre a Rome grand mal voir,
Nefs parfondrees, et prins le Tridental.
5:63
De vaine emprise l'honneur indue plaincte,
Galiotz errans par latins, froit, faim, vagues
Non loing du Tymbre de sang la terre taincte,
Et sur humains seront diverses plagues.
5:64
Les assemblés par repos du grand nombre
Par terre et mer conseil contremandé:
Pres de l'Autonne Gennes, Nice de l'ombre
Par champs et villes le chef contrebandé.
5:65
Subit venu l'effrayeur sera grande,
Des principaux de l'affaire cachés:
Et dame en braise plus ne sera en veue,
Ce peu a peu seront les grans fachés.
5:66
Soubs les antiques edifices vestaux,
Non esloignez d'aqueduct ruine.
De Sol et lune sont les luisans metaulx,
Ardante lampe, Traian d'or burine.
5:67
Quand chef Perouse n'osera sa tunique
Sans au couvert tout nud s'expolier:
Seront prins sept faict Aristocratique,
Le pere et fils mors par poincte au colier.
5:68
Dans le Danube et du Rhin viendra boire
Le grand Chameau, ne s'en repentira:
Trembler du Rosne, et plus fort ceux de Loire
Et pres des Alpes coq le ruinera.
5:69
Plus ne sera le grand en faux sommeil,
L'inquietude viendra prendre repoz:
Dresser phalange d'or, azur et vermeil
Subjuger Affrique la ronger jusques oz.
5:70
Des regions subjectes a la Balance
Feront troubler les monts par grande guerre,
Captifs tout sexe deu et tout Bisance,
Qu'on criera a l'aube terre a terre.
5:71
Par la fureur d'un qui attendra l'eau,
Par la grand raige tout l'exercite esmeu:
Chargé des nobles a dix sept bateaulx,
Au long du Rosne tard messagier venu.
5:72
Pour le plaisir d'edict voluptueux,
On meslera la poison dans l'aloy:
Venus sera en cours si vertueux,
Qu'obfusquera du soleil tout a loy.
5:73
Persecutee sera de Dieu l'Eglise,
Et les sainctz temples seront expoliez:
L'enfant la mere mettra nud en chemise,
Seront Arabes aux Polons ralliez.
5:74
De sang Troyen naistra coeur Germanique
Qui deviendra en si haute puissance:
Hors chassera gent estrange Arabique,
Tournant l'Eglise en pristine preeminence.
5:75
Montera haut sur le bien plus a dextre,
Demourra assis sur la pierre quarree,
Vers le midy posé a la fenestre,
Baston tortu en main bouche serree.
5:76
En lieu libere tendra son pavillon,
Et ne voudra en citez prendre place
Aix, Carpens l'isle volce, mont Cavaillon,
Par tous ses lieux abolira la trasse.
5:77
Tous les degrez d'honneur Ecclesiastique
Seront changez en dial quirinal:
En Martial quirinal flaminique,
Puis un Roy de France le rendre vulcanal.
5:78
Les deux unis ne tiendront longuement,
Et dans treize ans au Barbare Satrappe,
Au deux costez feront tel perdement,
Qu'un benira le Barque et sa cappe.
5:79
La sacree pompe viendra baisser les aisles,
Par la venue du grand legislateur:
Humble haulssera, vexera les rebelles,
Naistra sur terre aucun aemulateur.
5:80
Logmion grande Bisance approchera.
Chassee sera la barbarique Ligne:
Des deux loix l'une l'estinique laschera,
Barbare et franche en perpetuelle brigue.
5:81
L'oiseau royal sur la cité solaire,
Sept mois devant fera nocturne augure:
Mur d'Orient cherra tonnerre esclaire,
Sept jours aux portes les ennemis a l'heure.
5:82
Au conclud pache hors de la forteresse,
Ne sortira celuy en desespoir mis:
Quant ceux d'Arbois, de Langres, contre Bresse,
Auront monts Dolle bouscade d'ennemis.
5:83
Ceux qui auront entreprins subventir,
Nompareil regne, puissant et invincible:
Feront par fraude, nuicts trois advertir,
Quant le plus grand a table lira Bible.
5:84
Naistra du gouphre et cité immesuree,
Nay de parents obscure et tenebreux:
Qui la puissance du grand Roy reveree,
Voudra destruire par Rouen et Evereux.
5:85
Par les Sueves et lieux circonvoisins.
Seront en guerre pour cause des nuees.
Gamp marins locustes et cousins,
Du Leman fautes seront bien desnuees.
5:86
Par les deux testes, et trois bras separés,
La cité grande par eaux sera vexee:
Des grands d'entre eux par exile esgarés,
Par teste perse Bisance fort pressee.
5:87
L'an que Saturne hors de servage,
Au franc terroir sera d'eau inundé:
De sang Troyen sera son mariage,
Et sera ceur d'Espaignols circundé.
5:88
Sur le sablon par un hideux deluge,
Des autres mers trouvé monstre marin:
Proche du lieu sera faict un refuge,
Tenant Savone esclave de Turin.
5:89
Dedans Hongrie par Boheme, Nauarre,
Et par banniere sainctes seditions:
Par fleurs de lys pays portant la barre,
Contre Orleans sera esmotions.
5:90
Dans le cyclades, en perinthe et larisse,
Dedans Sparte tout le Pelloponnesse:
Si grand famine, peste par faux connisse,
Neuf mois tiendra et tout le chevronnesse.
5:91
Au grand marché qu'on dict des mensongiers,
Du tout Torrent et champ Athenien:
Seront surprins par les chevaux legiers,
Par Albanois Mars, Leo, Sat. un versien.
5:92
Apres le siege tenu dix sept ans,
Cinq changeront en tel revolu terme:
Puis sera l'un esleu de mesme temps,
Qui des Romains ne sera trop conforme.
5:93
Soubs le terroir du rond globe lunairs,
Lors que sera dominateur Mercure:
L'isle d'Escosse fera un luminaire,
Qui les Anglois mettra a deconfiture.
5:94
Translatera en la grand Germanie,
Brabant et Flandres, Gand, Bruges, et Bolongne:
La traifue fainte le grand duc d'Armenie,
Assaillira Vienne et la Coloigne.
5:95
Nautique rame invitera les umbres,
Du grand Empire lors viendra conciter:
La mer Aegee des lignes les encombres
Empeschant l'onde Tirremme defflottez.
5:96
Sur le milieu du grand monde la rose,
Pour nouveaux faicts sang public espandu:
A dire vray on aura bouche close,
Lors au besoing viendra tard l'attendu.
5:97
Le nay defforme par horreur suffoqué,
Dans la cité du grand Roy habitable:
L'edict severe des captifs revoqué,
Gresle et tonnerre, Condon inestimable.
5:98
A quarante huict degré climaterique,
A fin de Cancer si grande seicheresse:
Poisson en mer, fleuve: lac cuit hectique,
Bearn, Bigorre par feu ciel en destresse.
5:99
Milan, Ferrare, Turin, et Aquillaye,
Capne, Brundis vexés par gent Celtique:
Par le Lyon et phalange aquilee
Quant Rome aura le chef vieux Britannique.
5:100
Le boutefeu par son feu attrapé,
Du feu du ciel a Carcas et Cominge:
Foix, Aux, Mazere, haut veillart eschappé,
Par ceux de Hasse des Saxons et Turinge.
BIBLIOGRAFIE:
Sursa: http://fr.wikisource.org , 2013 |
Asoc. Cult. Enciclopedia Dacica
